lunes, 4 de febrero de 2013

CRÓNICA EN ASTURIANU. ZAFARRANCHU EN LA MI COCINA I y II


ZAFARRANCHU EN LA MI COCINA

 
I


         Voi hacevos una crónica en asturianu:

         Cuando se escangayó la lavadora, - paguéi cincuenta euros al técnicu por decime que nun merecía la pena arreglala-, pensamos que yera'l momentu d’atrevese a cambiar la cocina. Esto yera por la primavera del añu pasau y, desde entós, tuve entretenía yendo d'acá p'allá cola ilusión d'aforrar un duru.

         Pensámoslo muchu y decidímonos por el microcementu que ye, ¡como el estucu venecianu, nun vos digo más! Y amás casi nun hai obra nin tiés que mover pa nada lo que ta bien asitiáu: va pintáu encima de les parés y los suelos, y ¡llistu!

         El zafarranchu empezóse el 9 de enero d’esti añu y tenía que acabase el 25 o el 26, en total tres semanes, echando p`arriba. Pero, al quitar los muebles vieyos, cayeron, unu detrás d’otru, los azulejos que taben debajo: ¡había que ver aquel home, grandón como un armariu, sujetando les parés colos brazos! Luego vimos que nun había salida de humos y tuvimos que tirar la viga pa meter un tubu y entós ahora hay qu’hacela otra vez. Asín que tuve que llamar un albañil pa la emergencia. Y aluego tuve que buscar un carpinteru p'arrancar les jambes de les puertes. El eletricista tamién tuvo qu’hacer unes raspies que nun quería ni pa tras y como el mueble del fregaderu nun tién trasera ahora hai que pintar onde nun s’había pensáu, y anda too retrasáu. Y a otru día, al fontaneru olvidóse-y asitiar el toballeru antes de pegar el lavábu con silicona y, pa remátalo, quemóse l’aspirador de tanto polvu. ¿Voi ser yo gafe? ¡Esto ye l'acabose!

         Tengo que fregar los platos y les potes na bañera, y como el suelu ta pintáu y nun se pué pisar, hai que faer la cena nel garaxe, nuna parrilla, como si tuviéramos nel Oeste y salir con un paragües pa metela en casa, ¡fai un fríu que escarabaya el pelleyu! y ¡nun para de llover!). Anda tou manga por hombru, envueltu nuna capa gris, llenu de bolses de plásticu, baldes, botes apilaos junto a escaleres y máquines encaramaes cerrándote'l pasu. Yo que póngome como un oriziu por ná, paso lo mío, pero ye peor pa la perra y, sobre too, pa la gatina que tién que tar encerrá muches hores al día, porque nun fai caso de ná nin de naide y métese por cualesquier furacu.
 

II

         El microcementu ye una pintura guapa. L'oficial llámame cada pocu tiempu y dizme: “mire mire, ya se ven las aguas y ¡fíjese qué brillo!… Si es que es precioso, me tiene enamorado. ¡Lo ponía yo en mi casa ahora mismo, pero en casa del herrero…! Bueno, me lo podrías pintar tú…”, diz-y al aprendiz que paez americanu, pero ye rumanu, y él nun contesta, namás ríese y sigue trabayando. ¡Qué cosa esta xente! Nun tienen vacaciones, pero nun se-yos borra l'alegría de la cara.

         Nun soi a despertame d’esta pesadilla y tengo ganes de pisar un suelu que nun sía de periódicos con manches de cementu; liberáme d’una pila recaos tolos díes, volver ocupame de les mis coses; y, sobre too, oir cantar los paxarinos por la mañana, y non que me atruene la radio al altu la lleva, too el santu día col fútbol, qu’estos homes nun se cansen d’escuchar lo mesmo, ¡yá tien delitu, eh!

         Ye verdá qu’l microcemnetu ye muy vistosu, pero ¡cuidáu! nuevu pal suelu; asina que la gente, cuando y lo comentes, tuerce el focicu, y entós éntrame un canguelu que nun veas, a ver si va ser demasiáu delicáu. Bueno, ¡qué carayu!, va quedanos bien curiosu, neso tamos, pero hai qu'armarse de paciencia, porque paezme que esto acabaráse, como prontu, pa mediaos de febreru.

            Pa entós, quedáis toos invitaos a un culín de sidra o a un vinín, y pocu más voy poder davos, porque nun quiero saber lo que llevamos gastáu en esti fregau de mudar la cocina, ¡y en mediu d’esta puñetera crisis!

         Buenu fíos, hasta más ver. Un besu, Isabel

 
GLOSARIU

Mudar: Cambiar

Oriziu: Erizo de mar

Parés: Paredes

Potes: Cazuelas

Raspies: Rozas

Ye: Es